حضنك خلاني كرهت العالم !!بقلم الشاعر حسام البندارى

حضنك خلاني كرهت العالم !!بقلم الشاعر حسام البندارى

آه حضنك دمر فيا حاجات كتير ، خلاني كاره كل حاجة ، خلاني متحفز ، مش قادر أعيش حياة طبيعية ... وقبل ماتقولي عليا مجنون أو بخرف او يمكن مريض نفسي ، خليني اشرحلك !!

من بداية اللحظة اللي شفتك فيها وبصيت في عينك ، لونهم العسلي الشفاف ، هدوء ملامحك ونظراتك ، جفونك اللي كانت كل ماتقابل بعضها تضمني بعنف ، وبلمسة ايدك وانت بتسلمي عليا للمرة الأولي كانت لحظة اغتيال لكيان انهار بين رعشة ايدك وهي بتنسحب من حضن ايدي ..

في اللحظة دي نظرة عينك اتحولت لسحر أقوي من اني اعرف اقاومه ، وسيبت نفسي اغرق ، بعترف اني معرفتش اقاوم ، كنت متخدر ، هايم ، كان لون عينك لوحده كافي ، كنت واقفه قدامي في وسط الشارع وفجأة عيني مش شايفة غير لونهم العسلي وكإن الكون فجأه اختفى خوف من انه يغرق معايا !!

ومشينا ، او اتمشينا ، وضاع الوقت بسرعه وفجأة حضنتيني .. ضمتيني بقوة كلها رقة ، كياني كله اتنفض ، انت نفسك قولتيلي انت قلبك كان بيترعش ، معناها ان نبض قلبي من علوه كان واضح اوي ، كانت لحظة مسحتي فيها هموم سنين متراكمة زي جبل راسخ علي اكتافي ..

بس المشكله انك حولتيني في اللحظة دي من كيان قاسي جدا لكيان ضعيف ، بقيت احس بأي واحد قدامي ان كان بيكدب ولا لأ ، ان كان بيحبني فعلا ولا لأ .. بمجرد النظر ليه او سماع انفاسه وهو بيتكلم بقيت اعرف هو ايه بالظبط ..

ده لو ايده محاوطاني وبارع في التمثيل وصباع من ايديه مش ضامم او لامس عطم كتفي عشان في جواه قلق او شويه خنقة مني ، بحسها ، وبعرفها من غير ماينطق !! لو عينه بتنطق هسمعها ، لو دقة من دقات قلبه فيها كره هحسها .. صعب والله صعب !!

بسببك بقيت اشوف الناس من جواهم ، بقيت اشوف الاحساس كإني ساحر ، بقيت احس اكتر من الازم ..

وده والله العظيم بيوجع .. أه بيوجع ومفيهوش اي طعم لأي راحة .. كان مريح التعامل مع الناس باللي هما عاوزين يظهروه .. متعب اوي لما تبقي شايفة تفاصيل اللي قدامك ومعرياه بالشكل ده ..

متعب اكتر لإن انا وانتي في النهاية افترقنا ، متعب لان الطريق اتقسم ، متعب لاني مؤمن ان تكرارك مستحيل ، مؤمن بإن حضنك انت بالذات كان معجزة ، وياريت ترجعليلي لدقيقة واحدة !!

دقيقة واحدة تضميني وانت كارهاني ..
وانت مش طايقة اسمي ولا صوتي ولا وجودي ..

تحضنيني بكل كره وقسوة عشان يمكن ؛ يمكن ارجع سليم ومعمي زي ماكنت زمان !!

عرفتي بقى ليه حضنك خلاني كرهت العالم يا كل العالم حتى لو انت فعلا كرهتيني ..

مستغربة اني لسه جوايا كتير رغم كل اللي واصلين ليه .. .

عموما ..
اعتبريها تخاريف .. ودمت بكل خير

#تخاريف_حسام البندارى