ملح الارض بقلم الشاعر ( أبو يوسف صبرى )

ملح الارض بقلم الشاعر ( أبو يوسف صبرى )
.................
بيسألونى الناس ليه الأسى
مرسوم على جبينك
وبيسألونى ليه بالقهر
متكحلة عينك
ملامحك لون الوجع
و الحزن كاسى مواويلك
حكايتك إيه يا جدع
احكى واحنا راح نسمع
رديت بصوت مبحوح
والعيون تِدمع
أنا المظلوم طول عمرى
أنا المغلوب على أمرى
قهر الرجال يخلى
القلب يتوجَّع
لكنى عزيز نفس
و لغير الله ما أركع
أنا اللى ضربة الفاس
من يدِّى
تخلى الأرض تتبسم
و تطرح فرح
و بكلمة طيبة بريحة المسك
من فمِّى
يطيب الجرح
من غيرى الحياة
ملهاش طعم
حمال أسية من يومى
وصاين العرض
أنا عشانك يابلدى
شايل الهم
أنا الفلاح أنا المصرى
أنا ملح الأرض
.........................
( أبو يوسف صبرى )