سلف ودين بقلم الشاعر ابو يوسف صبري

سلف و دين
............
ولدى الحبيب
يوم ميلادك كان
أجمل يوم ف عمرى
كنت طاير م الفرح
و اختلط ضحكى بدمعى
و ناس تبارك وناس تهنى
و ناس تقول يارب خلى
 حضن أمك لم يفارقك
وحنانها كان غطاك وفرشك
نور عنينا كنت انت
والحب كله ياروحى انت
انت الأمل اللى ياما
حلمنا بيه
وانت السند  لما نكبر
نتعكز عليه
وابتدينا أنا وانت نكبر
انت جاى وانا  رااااايح
واما كنت ياولدى تغلط
قلبى كان دايما يسامح
قلبك ليه قاسى ياواد
ليه تطاوعه وتعصانى
رغم الأسى رغم العناد
مشتاق أخدك ف أحضانى
ارجع ياواد أمك خلاص
الفراق خد نور عنيها
انت الحبيب يا حلم عمرى
مين غيرك يسأل عليها
خلاص نسيت أمك وابوك
زاد الأسى ارحم ياواد
تعبنا وما باليد حيلة
خايف اشكيك لرب العباد
ما هُنت يوم ليه احنا هُنَّا
ضيَّعت ليه أملنا فيك
بكرة ياواد العمر يجرى
وابنك يرد عملك عليك
واللى بيعصى أمه وأبوه
حتما بيخسر دنيا ودين
رب العباد وصى عليهم
وكله ياواد سلف ودين
..........................
( أبو يوسف صبرى )